Холбоо барих

БОЛОВСРОЛЫН МАГАДЛАН ИТГЭМЖЛЭХ ҮНДЭСНИЙ ЗӨВЛӨЛИЙН
ДЭД ДАРГА, АЖЛЫН АЛБАНЫ ЗАХИРЛЫН МЭНДЧИЛГЭЭ



Манай цахим хуудсаар зочилж, БМИҮЗ-ийн алсын хараа, эрхэм зорилго, үйл ажиллагаатай танилцаж байгаа та бүхэнтэй хамт олноо төлөөлөн мэндчилж байгаадаа би туйлын баяртай байна. 1999 оноос дээд боловсролын магадлан итгэмжлэх үйл ажиллагааг эхлүүлж, улмаар мэргэжлийн болон ерөнхий боловсролын салбарт үйл ажиллагаагаа өргөжүүлэн тэлсэн манай хамт олон Монгол улсын боловсролын чанарыг тасралтгүй сайжруулах үйл хэрэгт чин сэтгэлээ зориулсан та бүхний оролцоонд тулгуурлан амжилттай ажиллаж ирсэн 20 гаруй жилийн түүхэн уламжлалаараа бахархдаг билээ. Боловсролын чанарын баталгаажуулалтын үндэсний төв байгууллага болохын хувьд БМИҮЗ нь боловсролын салбарын мэдээллийн төвийг байгуулах, чанарын хяналт, мониторинг, чанарын баталгаажуулалтын туршлагыг түгээн дэлгэрүүлэх, онол арга зүйн судалгаа хийх гол зорилгуудыг шинээр тодорхойллоо. Үүний тулд үндэсний шинжээч, мэргэжилтэн, судлаачдыг чадавхижуулж, улмаар олон улсын эрх бүхий шинжээчдийн нөөцийг нэмэгдүүлэх чиглэлээр олон ажлууд хийхээр төлөвлөж байна. БМИҮЗ нь олон улсад хүлээн зөвшөөрөгдөх чиглэлээр өмнө хүрсэн амжилтаа бататган гадаад харилцаа, хамтын ажиллагаагаа хөгжүүлэхэд онцгой анхааран ажиллах, түүний дотор хамтарсан магадлан итгэмжлэлийг 2020 онд туршин хэрэгжүүлэхийг зорьж байна. Бидний үйл ажиллагаанд идэвхтэй оролцох, хамтран ажиллах, дэмжин туслах хүсэл эрмэлзэлтэй байгууллага, хүмүүст үнэн зөв, бодит мэдээллийг түргэн шуурхай хүргэхийн хамт таны үнэтэй санал бодлыг энэхүү цахим хуудсаар нээлттэй хүлээн авах болно. Та бүхний сэтгэгдэл, санал, зөвлөмж бидний ажил үйлст төдийгүй Монгол улсын боловсролын чанарт үнэтэй хувь нэмэр оруулна гэдэгт би бат итгэлтэй байна.

Сайн үйлс дэлгэрэх болтугай.


ДЭД ДАРГА, АЖЛЫН АЛБАНЫ ЗАХИРАЛ
О.ЯНЖМАА