"Орон нутгийн их, дээд сургуулиудын тулгамдсан асуудал, шийдвэрлэх арга зам" сэдэвт эрдэм шинжилгээний бага хурал боллоо

Дорнод Дээд Сургуульд орон нутгийн их, дээд сургуулиудын эрдэмтэн, судлаачид цугларан, судалгааны илтгэлээ хэлэлцүүлэн, цаашид хэрэгжүүлэх арга хэмжээний талаар зөвлөмж гаргасан байна. Улаанбаатар хот болон 8 аймаг, гадаад, дотоодын нийт 120 гаруй зочид төлөөлөгч оролцон, "Орон нутаг дахь их, дээд сургуулиудын нийгмийн тулгамдсан асуудал", "Орон нутаг дахь их дээд сургуулиудын боловсролын шинэчлэлийн асуудал", "Орон нутаг дахь их, дээд сургуулиудын эдийн засаг, менежментийн асуудал" гэсэн 3 салбар хуралдаанаар нийт 30 гаруй илтгэл хэлэлцэгдэн, санаа бодлоо хэлсэн байна.

Эрдэм шинжилгээний хуралд ШУА, БШУЯ, Боловсролын магадлан итгэмжлэх үндэсний зөвлөл, Дээд боловсролын шинэчлэл төсөл, Дархан, Эрдэнэт болон ОХУ-ын Буриад улсын Багшийн коллеж, ЭМШУИС-ийн Дорноговь салбар, Ховд Их Сургууль, МУБИС, Завхан МУИСургууль, ЭМШУИС-ийн Говь-Алтай аймаг дахь салбар сургууль, МУБИС-ийн Архангай аймаг дахь Багшийн сургууль, Сүхбаатар аймгийн төлөөлөгчид, эрдэмтэн судлаачид оролцсон чухал ач холбогдолтой хурал болж өнгөрлөө.

Хуралд Дорнод аймгийн засаг дарга С.Ганбат, БШУЯамны Дээд боловсролын хэлтсийн дарга П.Эрхэмбулган, БМИҮЗ-ийн дэд дарга Х.Батсайхан нар хурлын үйл ажиллагаанд амжилт хүсч үг хэллээ. 

 Зүүн бүсийн их сургууль, сургалт судалгааны томоохон төв болон өргөжих зорилгыг тавин ажиллаж байгаа  доктор О.Янжмаа захиралтай хамт олон амжилттай зохион байгуулжээ.